Susanna M Lingua Omnibus 2

Duisend sterre: As stiefdogter van ’n welaf Portugese sakeman, het Eyesha vryhede wat haar vriendinne nie veroorloof is nie. Sy rits die wêreld vol, eers op haar bromponie, toe in haar sportmotor. Sy mag selfs haar man kies. Haar lewe is ongekompliseerd, tot die geheimsinnige Filipe haar agtervolg, haar liefde wen ... en eindelik haar hart breek. Kasteel van die Arend: Rynie besoek haar familie in ’n Italiaanse dorpie met ’n eeue oue kasteel. Sy kry toestemming by die eienaar, die markies Renaldo de Mazziani, om dit te skilder. Hy’s die soort man oor wie sy net kan droom, maar voor sy weet, raak sy onskuldig vasgevang in ’n venynige stryd om die markies se hart. Boodskap in die wind: Ná haar ma se dood, werk Sara soos ’n slaaf vir haar stieffamilie. Sy vlug, en dinge loop bitter skeef. Met haar lewe eindelik weer op die spoor, werk sy as ontvangsklerk in ’n luuksehotel, maar die eienaar, die markies De Veracci, én sy broer wil met haar trou. En weer moet sy padgee.